Referendumprovinzial2022
Referendum confermatif provinzial
29 de ma 2022, dales 7:00 ales 21:00

Ai 29 de ma dl 2022 podará dötes les porsones che á le dërt da lité tl Südtirol dé jö süa usc sön chësta domanda de referendum:

Sëise a öna cun le test dla lege sön les “Mudaziuns dla lege provinziala di 3 de dezëmber dl 2018, n. 22, ‘Democrazia direta, partezipaziun y formaziun politica’, y dla lege provinziala di 8 de forá dl 2010, n. 4, ‘Istituziun y regolamënt dl Consëi di Comuns’”, aprovada dal Consëi provinzial di 11 de jügn dl 2021 y publicada sön le Boletin Ofizial dla Regiun n. 27 di 8 de messé dl 2021?

Por ci liton pa?

Le test de lege sotmetü ala litaziun müda les leges da denant di 3 de dezëmber dl 2018, n. 22 (Democrazia direta, partezipaziun y formaziun politica) y di 8 de forá dl 2010, n. 4 (Istituziun y regolamënt dl Consëi di Comuns).

Le test de lege nü prevëiga mudaziuns:

La lege nöia sotmetüda a chësc referendum müda desposiziuns desvalies dles leges provinziales nominades tla domanda dl referendum; les leges provinziales sotmetüdes a chëstes mudaziuns regolamentëia da öna na pert la democrazia direta, la partezipaziun y la formaziun politica a livel provinzial, y dal’atra pert le Consëi di Comuns.

Les leges provinziales n. 22/2018 y n. 4/2010 romagn en forza te süa verjiun atuala cina che al vëgn eventualmënter aprové le test de lege nü dala maioranza de che che vá a lité (usc por le SCE).

Sce la maioranza de che che lita lita NOU ales leges provinziales n. 22/2018 y n. 4/2010, ne vëgnel fat degüna mudaziun (usc por le NOU).

Desćiaria chiló le PDF cun le test dla lege sotmetüda a referendum confermatif

Dessot vára da desćiarié n file cun le test dles leges provinziales n. 22/2018 y n. 4/2010, coordiné cun les mudaziuns preodüdes dala lege sotmetüda a referendum confermatif:

• Desćiaria chiló le PDF cun le test coordiné dles leges provinziales n. 22/2018 y n. 4/2010
• PDF dla lege provinziala n. 22/2018
• PDF dla lege provinziala n. 4/2010

Che pó pa lité?

Al pó tó pert al referendum les zitadines y i zitadins che á cumplí 18 agn ai 29 de ma dl 2022, é scric ite tles listes litales y á le de dla publicaziun dla convocaziun dla lita la residënza tl teritore dla regiun Trentin-Südtirol da cater agn zënza interuziun, y de chisc cater altamo dui tl teritore dla provinzia de Balsan.

Modalité da lité

Les litadësses y i litadus mëss se presenté tla seziun dada dant sön süa tessera litala cun la tessera litala y n documënt de reconescimënt (sce i se l’ëis pordü o al ves é gnü tut jide ti ofizi litai de comun). Les sëntes litales romagn davertes dales 7.00 ales 21.00.

Quorum

Por le referendum confermatif n’él nia preodü N QUORUM; chël ó dí che le referendum valará bel anfat tan de jënt che vá a lité.

La maioranza dles usc davagna.

Sce al davagna le SCE

Sce la maioranza de che che lita dal referendum lita de SCE, promulghëia le Presidënt dla Provinzia le test de lege nü, che vá insciö en forza. Les döes leges provinziales “Democrazia direta, partezipaziun y formaziun politica” y “Istituziun y regolamënt dl Consëi di Comuns” vëgn mudades.

La maioranza de che che lita confermëia le test dla lege, che ê bele gnü aprové dal Consëi provinzial.

Sce al davagna le NOU

Sce la maioranza de che che lita dal referendum lita de NOU, ne vá le test de lege che müda la lege provinziala “Democrazia direta, partezipaziun y formaziun politica” y la lege provinziala “Istituziun y regolamënt dl Consëi di Comuns” nia en forza y n’á degöna faziun. Les döes leges romagn en forza tla verjiun da sëgn.

La maioranza de che che lita ne confermëia nia le test dla lege, che ê bele gnü aprové dal Consëi provinzial.

Informaziuns generales

Ai 29 de ma vëgnel tigní n referendum confermatif provinzial. Chësc é gnü incundé danü cun le decret dl Presidënt dla Provinzia n. 5089 di 25 de ma dl 2022.

Al é le secundo iade che les litadësses y i litadus dl Südtirol tol pert a n referendum confermatif a livel provinzial.

Les litadësses y i litadus vëgn cherdá a respogne a chësta domanda dl referendum:

Sëise a öna cun le test dla lege sön les “Mudaziuns dla lege provinziala di 3 de dezëmber dl 2018, n. 22, “Democrazia direta, partezipaziun y formaziun politica”, y dla lege provinziala di 8 de forá dl 2010, n. 4, “Istituziun y regolamënt dl Consëi di Comuns””, aprovada dal Consëi provinzial di 11 de jügn dl 2021 y publicada sön le Boletin Ofizial dla Regiun n. 27 di 8 de messé dl 2021?

Dötes les informaziuns sön le contignü dla lege, sotmetüdes a referendum é da ciafé tla seziun aposta denominada OGET DLA LITAZIUN.

Anunzia dl resultat

Sön la basa di verbai de lita ortiá inant dai ofizi litai de seziun dla provinzia, vëgnel ciafé sö le numer di litadus y dles litadësses che á tut pert ala litaziun y, do avëi controlé les usc cun le SCE y chëres cun le NOU, vëgnel anunzié le resultat arjunt cun le referendum.

Le referendum confermatif é vincolënt.

Tl caje de n resultat positif aprovëia le Presidënt dla Provinzia la lege provinziala nöia, la lege vá en forza (usc por le SCE).

Tl caje de n resultat negatif ne vá le test de lege nia en forza y al n’á degöna faziun (usc por le NOU).

Quorum

Por le referendum confermatif n’él nia preodü N QUORUM; chël ó dí che le referendum valará bel anfat tan de jënt che vá a lité.

La maioranza dles usc davagna.

Ala veles ie cherdedes la zitadines/cherdei i zitadins che n la data di 29 de ma dl 2022 à cumplì 18 ani, che ie scrites/scric ite tla listes liteles, che n l di dla publicazion dl decret de ndizion dla veles à da cater ani zënza nteruzion la residënza tla region Trentin-Südtirol y che à madurà la majera pert de chisc cater ani de residënza tl teritore dla provinzia de Bulsan.

N l di dla veles (29 de ma 2022) resta la sëntes liteles daviertes dala 7.00 ala 21.00. Di lëures de preparazion dla sënta se cruzions l di dant (sada 29 de ma 2022).

La zitadines y i zitadins à da se presenté tla sezion litela ndicheda tla cherta litela n l dì dla veles cun la cherta litela nunzieda y cun n documënt de recunescimënt.

Chi che ne à deguna cherta litela, ajache les/i nen à mei giapà una o tl cajo che la ie unida ruineda, perduda o rubeda, muessa damandé do pra l ufize litel de chemun, che resterà daviert dai 27 ai 28 de ma dala 9.00 ala 18.00 y ai 29 de ma per dut l tëmp dla veles. Iló giaperan pona aldò dl cajo, na cherta litela nueva, n duplicat o n atestat de sostituzion.

Vela da pert dla reprejentantes/di reprejentanc dl militer

La reprejentantes/I reprejentanc dla forzes armedes y de grupes militeres a servisc dl stat, sciche nce chi che fej pert dla polizai de stat, possa jì a lité, sce les/i nen à l dërt, te chël Chemun, ulache les/i ie per rejons de servisc.

Mustran la cherta litela possi dé ju si usc te ce sezion che i uel.

Les/I daussa mé jì un al iede y zënza erma a dé ju si usc.

Vela da pert dla persones staziunedes tla cëses de cura

La persones staziunedes te spediei y cëses de cura y che à l dërt de lité tl spedel o tla cësa de cura.

La persones nteressedes muessa presenté – tres la strutura, ulache les ie staziunedes – ala Ambolta/al Ambolt dl Chemun, tla listes de chël che les ie scrites ite, si ulentà de lité tla cësa de cura.

Tla detlarazion muessel unì dat sëura avisa l numer dla sezion litela a chëla che la litadëura/l litadëur ie assenieda/assenià y l numer de iscrizion tla lista litela, che ie da udëi sun la cherta litela; oradechël muessel nce vester njuntà l atestat dla diretëura sanitera/dl diretëur saniter dla cësa de cura, che cunfermea che la litadëura/l litadëur ie staziuneda/staziunà iló.

La detlarazion muessa unì mandeda al Chemun da pert dl diretëur dl’aministrazion o dl secreter dla cësa de cura, nia plu tert che l terzo dì dan la data dla veles (26 de ma 2022).

Pernan che l’Ambolta/l Ambolt à giapà la detlarazion se cruziela/cruziel riesc, nce per telegram, de ti fé avëi a chi che à fat dumanda n atestat che l ie unit fat la iscrizion tla listes dla/di litadëures tla cëses de cura. La/I litadëures staziunei ne possa nia lité tla cësa de cura sce no do avëi mustrà danora chësc atestat y la cherta litela.

Lita da pert dla persones che ne ie nia bones de jì

Diverda che la/i litadëures che ne n’ie nia bones/boni de jì sibe scric ite pra na sezion a chëla che l ne ie nia mesun ruvé permez cun n stuel da rodes posseles/possi dé ju si usc te n’autra sezion zënza mpedimënc architetonics. (Tlo dessot iel na lista de duta la sezions zënza mpedimënc architetonics). Tl local cris ora per dé ju la stima muessa chësta/chisc litadëures mustré su deberieda cun la cherta litela l zertificat dl dutor dl’azienda sanitera (l vën nce azetà n zertificat scrit ora dant per vel’autra rejon) o na copia autenticheda dla patent speziela per avisé, a na moda che l vënie ora tler dala documentazion mustreda su che chësta persona ne sibe veramënter nia bona de jì o da stramb stenteda.

A uni moda à i Chemuns da mëter a jì n servisc de trasport adatà, acioche l sibe plu saurì per la/i litadëures che ne ie nia bones/boni de jì de ruvé pra l local de vela.

Vela da pert dla persones śaredes te perjon

Chi che ie te perjon y a chëi che l ne ti ie nia unì tëut l dërt de lité possa dé ju si usc tl luech ulache les/i ie śaredes/śarei via.

La persones nteressedes muessa presenté per scrit na detlarazion che les uel lité ulache les/i ie śaredes/śarei ite.

Tla detlarazion muessel unì dat sëura avisa l numer dla sezion te chëla che la litadëura/l litadëur ëssa da jì a lité y l numer de iscrizion tla lista litela de sezion, che ie da udëi sun la cherta litela; oradechël muessel nce vester njuntà l atestat dla diretëura/dl diretëur dla perjon che cunfermea che la litadëura/l litadëur ie śareda/śarà ite iló. La detlarazion ti muessa unì fata avëi al Chemun da pert dl diretëur dla perjon, nia plu tert che l terzo di dan chël dla veles (26 de ma 2022) .

Pernan che l’ambolta/l ambolt giapa la detlarazion se cruziela/cruziel riesc de ti fé avëi, nce per telegram, a chi che à fat dumanda n atestat che la/l ie unit scrit ite tla listes dla/di litadëures śaredes/śarei via.

Chësta/Chisc litadëures possa mé lité sce les/i à da mustré su la cherta litela y chësc atestat.

Vela da pert dla persones che à debujën de secudienza a dé ju si usc

La persones purtadëures de handicap che ne ie nia bones de lité da sëules, possa se lascé acumpanië da zachei che les à nstësses cris ora per jì a lité. La persona che les acumpanieia muessa vester scrita ite tla listes liteles de n Chemun dla provinzia de Bulsan.

L zertificat dl dutor che possa n cajo unì damandà dala presidënta/dal presidënt dla sënta litela muessa unì scrit ora dai dutores nciariei dal’aziendes saniteres locales. L zertificat nunzià tlo dessëura vën scrit ora sun papier scëmpl, l ie debant y n n’à nia drë de mëter su vel’ marches o boi.

Mpede l zertificat dl dutor possa la/i vierces mustré si cherta de iscrizion ala Lia di vierces taliana.

Vela a cësa

L ti vën cunzedù de lité a cësa ala/ai litadëures te cundizions scialdi grieves de nfermità, che ne possa nia jì ora dl cuatier ulache les/i sta, y ala/ai litadëures tuchei da nfermità grieva, che depënd per viver tresora da aparac de medejina eletronics y ne possa perchël nia jì ora de cësa.

La persones nteressedes muessa ti presenté al’Ambolta/al Ambolt dl Chemun, te chël che les/i ie scric ite tla listes liteles – te n tëmp danter l 40ejim y l 20ejim dì dan la veles – na detlarazion scrita che atesteie si ulentà de purté a esprescion si usc te si abitazion.

Tla detlarazion muessel unì dat sëura avisa l numer dla sezion te chëla che la litadëura/l litadëur ëssa da jì a lité y l numer de iscrizion tla lista litela de sezion, che ie da udëi sun la cherta litela; ala detlarazion muessel oradechël nce vester njuntà l atestat dla funzioner medich desinià dai organns cumpetënc dl’Azienda Sanitera che atesteie la esistënza de cundizions de nfermità nunziedes dessëura.

Pernan che l’Ambolta/l Ambolt giapa la detlarazion se cruziela/cruziel riesc de nen fé verifiché la regularità y cumpletëza y l relascia a chi che à fat dumanda n atestat che la/l ie unit scrit ite tla listes dla/di litadëures lascei pro ala lita a cësa.

Vela di litadëures che sta oradecà

L dërt de lité à la zitadines y i zitadins che à si residënza oradecà y che n la data dl’emigrazion ova i recuisic udui danora per pudëi lité; nce la fians/i fions de chisc nasciui o trasferii oradecà o l uem/la fëna de chisc, che à giapà la zitadinanza taliana tres l matrimone. La cundizion che ie de bujën per pudëi lité ie la iscrizion tl AIRE (register anagrafich di zitadins talians che sta oradecà).

La/I litadëures che sta oradecà y che ie scric ite tl AIRE eserzitea si lita tres posta. La manieres de lita ie dates sëura tla sezion aposta Lité por corespondënza.

La litadëura/L litadëur che sta oradecà y che, per pudëi eserzité si dërt de vela, ulëssa unì de reviers tl Südtirol y lité diretamënter pra la sezion litela, muessa presenté na dumanda aposta a si Chemun de iscrizion.

Le formular che alda lapró pó gní desćiarié online (ciara la seziun Lité por corespondënza).

Tl cajo che la/l à optà per l eserzize de vela tla provinzia messerà la litadëura/l litadëur che sta oradecà se se presenté de persona pra la sezion data sëura sun si cherta litela, cun la cherta litela y n documënt de recunescimënt.

A pië via dal 2013 iel unit tëut ju l cuntribut che univa n iede paià ora dai chemuns singui a chësta categuria de litadëures.

Perchël ne arà la zitadines y i zitadins che sta oradecà y che tol la dezijion de lité tla provinzia de Bulsan, pra la sezion litela de si Chemun d’iscrizion, nia l dërt de giapé n rembursamënt o n cuntribut.

L ne vën oradechël ënghe nia paià i alesiramënc sun la spëises de viac sun l teritore dla Talia, tla ferata o per mer.

Per duta la nfurmazions che reverda la lita dla persones che sta oradecà prions bel de jì a ti cialé ala sezion aposta dedicheda ala Lité por corespondënza.

N l di dl referendum ai 29 de ma 2022 resta la sëntes liteles daviertes dala 7.00 ala 21.00. Di lëures de preparazion dla sënta se cruzions l di dant.

La zitadines y i zitadins à da se presenté tla sezion litela ndicheda tla cherta litela n l dì dla veles cun la cherta litela nunzieda y cun n documënt de recunescimënt.

Chi che ne à deguna cherta litela, ajache les/i nen à mei giapà una o tl cajo che la ie unida ruineda, perduda o rubeda, muessa damandé do pra l ufize litel de chemun, che resterà daviert dai 27 ai 28 de ma dala 9.00 ala 18.00 y ai 29 de ma per dut l tëmp dla veles. Iló giaperan pona aldò dl cajo, na cherta litela nueva, n duplicat o n atestat de sostituzion.

1. Documënc d’identificazion dac ora dal’aministrazion publica: Cherta d’identità, passaport, patent d’abilitaziona furné cun veicui, purteda d’ermes, libret dla ferata, y nsci inant…)
2. la chertes de recunescimënt dates ora dala Union naziunela ufezieres n cungedazion dla Talia (U.N.U.C.I.), sce les à na fotografia y ie cunvalidedes da n Comando militer,
3. la tesseres dates ora dai ordens di prufescionisć, sce l ie lessù na fotografia

La zedula litela ie blancia.

Facsimile dla zedula litela Val Badia

Facsimile dla zedula litela Val Gardena

Sun la zedula litela iel scrit la dumanda sometuda ala/ai litadëures che à l dërt de dé ju si usc fajan n sëni (p.ej. na crëusc o na rissa) sun l cheder che curespuend ala resposta uluda: SCI o NO.

La/I litadëures sarà cherdei a respuender a chësta dumanda dl referendum:

“Sëis’a a una cun l test dla lege sun la “Mudazions dla lege provinziela di 3 de dezëmber 2018, n. 22, “Democrazia direta, partezipazion y furmazion politica”, y dla lege provinziela di 8 de fauré 2010, n. 4, “Istituzion y urdinamënt dl Cunsëi di chemuns””, apurveda dal Cunsëi provinziel ai 11 de juni 2021 y publicheda tl Buletin Ufiziel dla Region n. 27 di 8 de lugio dl 2021?”

La/I litadëures che uel apurvé (y nsci cunfermé) l test de lege, muessa senië l cheder cun l SCI.

La/I litadëures che ne uel nia apurvé l test de lege, muessa senië l cheder cun l NO.

Dl 2013 él gnü porté ite a livel provinzial la LITA POR CORESPONDËNZA por döes categories de porsones desvalies:

1. la lita por corespondënza por les litadësses/i litadus südtirolesc che á la residënza foradecá y é scrić ite tl AIRE (le register anagrafich di zitadins talians che á la residënza foradecá);
2. la lita por corespondënza por les litadësses/i litadus che ne sciafia nia da lité tl comun de residënza, ajache ai vir temporaneamënter defora dla provinzia.

La lita por corespondënza por les litadësses/i litadus che á la residënza foradecá

Che che á la residënza foradecá y é scric ite tl AIRE lita por posta.

Sce i orëis indere lité te osta seziun litala tl Südtirol messëise fá domanda.

Formular de domanda

Che che á la residënza foradecá ciafará adöm cun la comunicaziun y les informaziuns sön la lita por posta, ince n formular de domanda, che messará gní scrit fora y ortié al comun d’iscriziun, sce ara/al ó gní zoruch tl Südtirol a lité diretamënter pro la seziun litala de so Comun. La domanda messará rové alplü tert ai 14 d’aurí dl 2022, chël ó dí alplü tert 45 dis dan le de dla litaziun.

La domanda vel ma por la lita por chëra che ara é gnüda dada jö, y n iade che le termin dé dant é tomé, ne pón nia plü la trá derevers. La domanda pó gní dada jö personalmënter, ortiada por posta, tres fax o posta eletronica y ara mëss contigní i dac anagrafics, la dërta misciun y la sotescriziun dla porsona che fej domanda, scenó vëgnera refodada. Pro la domanda mëssel gní ajunté la fotocopia de n documënt d’identité.

Desćiariede jö chiló le formular por la domanda PDF (solo in tedesco) Word (solo in tedesco)

Che che á la residënza foradecá che tol la dezijiun da lité tla provinzia de Balsan diretamënter tla seziun litala de so Comun n’á nia le dërt da ciafé N REMBURSAMËNT O N CONTRIBUT.

Al ne vëgn gnanca conzedü alisiraziuns de iade por le raiun talian, cun la ferata o la barca.

Dötes les zitadines y düc i zitadins che á la residënza foradecá, che n’á nia dé jö la domanda da lité te so Comun d’iscriziun tl Südtirol, lita por corespondënza.

Informaziuns plü menüdes sön la lita por corespondënza é da ciafé tla seziun MODALITÉS DA LITÉ POR CORESPONDËNZA

La lita por corespondënza por les litadësses/i litadus che vir temporaneamënter defora dla provinzia

Ince les porsones che ne sciafia nia da lité te so Comun d’iscriziun, ajache ares vir temporaneamënter defora dla provinzia, pó lité por corespondënza.

Por podëi s’anuzé dla poscibilité da lité por corespondënza, mëss che che lita dé jö na domanda aposta te so Comun d’iscriziun.

Formular de domanda

Che che lita mëss dé jö na domanda (ara/al pó tó le formular aposta, che an pó desćiarié jö sön chësta plata internet) te so Comun d’iscriziun. La domanda messará rové alplü tert ai 14 d’aurí dl 2022, chël ó dí alplü tert 45 dis dan le de dla litaziun.

La domanda vel ma por la lita por chëra che al é gnü fat domanda, y sce le termin dé dant é tomé, ne pón nia plü jí a s’la dó. Ara pó gní dada jö personalmënter, ortiada por posta, tres fax o posta eletronica zerificada y ara mëss contigní i dac anagrafics, la dërta misciun y la sotescriziun dla porsona che fej domada, scenó vëgnera refodada. Pro la domanda mëssel gní ajunté la fotocopia de n documënt d’identité.

Desćiariede jö chiló le formular por la domanda PDF (solo in tedesco) Word (solo in tedesco)

De plü informaziuns sön la lita por corespondënza é da ciafé tla seziun MODALITÉS DA LITÉ POR CORESPONDËNZA

Modalités da lité por corespondënza

Injop lital por lité

Che che lita por corespondënza ciafa n injop lital che contëgn:

1. n zertificat lital cun i dac anagrafics de che che lita: le zedolin lital mëss gní trat jö dal zertificat aper dla linia aposta;
2. la zetola litala;
3. na picia coperta börna por mëte ite la zetola litala do avëi dé jö la usc;
4. na gran coperta blancia amartlada (cun la misciun dla Comisciun por i prozedimënc dl referendum) da tó por ortié zoruch le zedolin lital y la picia coperta börna cun la zetola litala;
5. na plata cun les indicaziuns dles modalités da lité por corespondënza, y le test dla lege sön les “Mudaziuns dla lege provinziala di 3 de dezëmber dl 2018, n. 22, “Democrazia direta, partezipaziun y formaziun politica”, y dla lege provinziala di 8 de forá dl 2010, n. 4, “Istituziun y regolamënt dl Consëi di comuns””.

Co liton pa por corespondënza

Informaziuns sön co lité por corespondënza

La usc vëgn dada jö sön la zetola litala MA cun N BIRO FOSCH O BRÖM, scenó vëgn la zetola litala anulada.

LA USC É PERSONALA, LËDIA Y SOCRËTA. LA ZETOLA Y LA PICIA COPERTA BÖRNA OLACHE ARA É LAITE NE DESS AVËI DEGUN SËGN DE RECONESCIMËNT!

AL É PROIBÍ DA LITÉ DE PLÜ IADI Y ORTIÉ INANT LES ZETOLES IMPEDE ZACAI D’ATRI!

Do avëi dé jö la usc sön la zetola litala, mëssel gní metü la zetola litala tla PICIA COPERTA BÖRNA, che mëss gní sigilada y mëtüda tla GRAN COPERTA AMARTLADA aposta, olache al vëgn ince metü LE ZEDOLIN lital (do che al é gnü trat jö aper dla linia aposta), che proa che al é gnü dé jö la usc. Spo vëgn la gran coperta amartlada ortiada ala Comisciun por i prozedimënc dl referendum, olache ara mëss rové alplü tert cina le vëndres dan le de dla lita (ai 27 de ma dl 2022).

I ves aconsiun da s’anuzé le plü debota che ara vá de osc dërt da lité y ortié atira la coperta amartlada, a na moda che ara ti röies adora assá ala Comisciun por i prozedimënc dl referendum.

Do avëi ortié la coperta amartlada ne vál plü debojëgn da ne fá nia.

Cumpedé les zetoles litales

Dötes les copertes che ti röia adalerch por tëmp y ora ala Comisciun por i prozedimënc dl referendum (cina le vëndres dan les lites) gnará dades jö – do na seria de controi formai preodüs dala lege – ai ofizi litai aposta, metüs sö tl comun de Balsan, che se cruziará da cumpedé les zetoles litales, canche al vëgn ince cumpedé chëres dles atres seziuns litales sön döt le raiun provinzial.

Istruziuns Coronavirus

An mëss se tigní inant a chëstes mosöres de segurëza:

• se vistí la maschera,
• igenisé les mans,
• sté tres altamo n meter dainciará dales porsones, ince sce an aspeta tla fila,
• schivé mejes,
• sce an á passa 37,5 degrá de borjú o d’atri sintoms dles vies dl fle án la responsabilité da respeté la regola de prevenziun de basa da ne jí nia a lité.

Les porsones che é sotmetüdes a n tratamënt a ciasa o é te isolamënt porvia dl Covid-19 ne pó nia jí a lité! Chëstes porsones pó damané da lité a ciasa aladô dles modalités dades dant ala fin de chësc capitul.

Percursc dedicá, destanza de segurëza y mascheres

Al é preodü percursc despartis por l'entrada y la sortida dala seziun litala. Sce al vá debojëgn gnarál preodü le smendrimënt di azesc al frabicat, cherian eventualmënter raiuns d’aspeta aposta defora. I locai arjigná ca sciöche seziun litala á lercs che conzed da mantigní la destanza de altamo n meter dales atres porsones.

Laurs de litaziun

Tl raiun dl’entrada y tl salf lital vëgnel metü a desposiziun n meso de dejinfeziun. Tratan i laurs de litaziun igenisëia i componënc dles seziuns litales periodicamënter les surasperses de contat, cun lapró les mëses y les cabines litales. Tratan l’identificaziun de che che lita vëgnel garantí na destanza adatada, canche al ti vëgn damané da tó demez la maschera por gní reconesciüs.

Por smendrí les ocajiuns de contat y se stravardé dala difujiun epidemiologica, mëss les porsones che lita se dejinfé les mans pornanche ares röia tl salf lital. Do l’identificaziun dla porsona che lita y denanco ti dé la zetola litala, vëgn les mans ciamó n iade dejinfetades. Ma che che lita pó mëte süa zetola litala tl’urna. La porsona che á le dërt da lité lobrësc adöm la zetola do che ara é jüda te cabina a lité y la mët personalmënter tl’urna. Do avëi lité fossel bun da se dejinfeté ciamó n iade les mans.

DRINGLICHKEITSMAẞNAHME DES LANDESHAUPTMANNS BEI GEFAHR IM VERZUG vom 12. Mai 2022, Nr. 15

Rundschreiben Nr. 48/2022 des Innenministeriums
Gesundheits- und Sicherheitsprotokoll für die Durchführung von Wahlhandlungen und Volksabstimmungen im Jahr 2022

Lita a ciasa tl caje de tratamënt a ciasa o isolamënt

Les porsones sotmetüdes a n tratamënt a ciasa o te isolamënt porvia dl Covid-19 pó lité a ciasa tl comun de residënza.

Por chësc fin pó che che lita ti ortié, danter le 10. y le 5. de dan la lita al’ombolta/al ombolt dl comun d’iscriziun tles listes, cun modalités ince informatiches fates fora dal comun, chisc documënc:

1. na detlaraziun olache an detlarëia da orëi dé jö la usc a ciasa, don dant avisa la misciun intiera dl domizil;
2. n zertificat, relascé dala doturia/dal dotur designé dai organs competënc dl’aziënda sanitara locala, alplü adora 14. dis dan la data dla litaziun, che atestëia les condiziuns preodüdes dal decret-lege n. 41/2022 por le dërt da lité a ciasa (tratamënt a ciasa o condiziuns de isolamënt porvia dl Covid-19).

L’ofizial lital dl comun olache la porsona é scrita ite tles listes litales:

1. mët, do avëi aldí l’aziënda sanitara locala, na nota aposta sön les listes y mët la porsona interessada tles listes dles porsones che pó lité a ciasa, sostignin la colaboraziun cun i ënc interessá;
2. assegnëia la porsona che pó lité a ciasa:
   • ala seziun d’ospedal plü daimpró al domizil, ti comuns olache al é les strotöres sanitares cun repartiziuns Covid-19;
   • ala sënta litala speziala inciariada dla racoiüda dles usc, metüda sö ti comuns olache al n’é nia strotöres sanitares cun repartiziuns Covid-19.

Sön la basa dles domandes rovades adalerch se crüzia l’ombolta/l’ombolt da planifiché y organisé le sostëgn tecnich-operatif a desposiziun dles sëntes litales por la racoiüda dles usc a ciasa y ti lascia alsavëi cina le de dan la data dla litaziun ales porsones che á damané da dé jö süa usc a ciasa, ci sënta litala speziala che é gnüda inciariada dla racoiüda dles usc.

Les usc vëgn coiüdes adöm tratan le medemo orar che an lita tles sëntes litales ordinares, chël ó dí dales 7.00 ales 21.00 dla domënia.

Al mëss a vigni moda gní garantí cun vigni meso adaté, la lita lëdia y socrëta tl respet di bojëgns coliá ales condiziuns de sanité dla porsona che lita y se tignin avisa ales indicaziuns dades dant dal’autorité sanitara competënta.

L’ombolta/L’ombolt nominëia por vigni seziun n ofize lital metü adöm dala presidënta/dal presidënt, da trëi cumpëdausc, olache öna o un de chisc - chirí fora dala presidënta/dal presidënt - surantol l’inciaria de vizepresidënta/vizepresidënt, y dala secreteria/dal secreter. Sce al é tl raiun dl ofize lital de seziun ospedai y ciases de cura cun manco co 100 lec o sce la seziun á le dovëi da cöie adöm les usc dades jö a ciasa, é l’ofize lital metü adöm dala presidënta/dal presidënt, da cater cumpëdausc y da na secreteria/n secreter.

Les/I cumpëdausc y la secreteria/le secreter dl ofize lital de seziun vëgn chiris fora, tiran ala niza, danter les porsones che á stlüt jö la scora d’oblianza.

La lita dla presidënta/dl presidënt dl ofize lital de seziun vëgn fata tiran ala niza, danter les porsones che:

1. é scrites ite tles listes litales dl Comun canche al vëgn publiché le decret de convocaziun dles lites
2. á le dërt da lité dales lites provinziales;
3. á almanco le diplom de na scora alta;
4. á l’atestat che desmostra la conescënza di lingac todësch y talian, aladô dl decret dl presidënt dla Republica di 26 de messé dl 1976, n. 752, y mudaziuns suandëntes;
5. á, sce ara se trata de n Comun ladin, l’atestat che desmostra la conescënza dl lingaz ladin, aladô dl decret dl presidënt dla Republica di 26 de messé dl 1976, n. 752, y mudaziuns suandëntes;
6. é scrites ite tl register dles porsones adatades al’inciaria de presidënt/presidënta dl ofize lital

Al ne pó nia fá pert dl ofize lital:

1. i mëmbri dles forzes armades en sorvisc;
2. doturies ofiziales/doturs ofiziai y doturies/ doturs de basa;
3. secreteries/secreters de comun y dependëntes/dependënc de comun, assegná o comaná por le sorvisc ti ofizi litai de comun;
4. candidates/candidac dles lites dl Consëi provinzial.

Danter le 25ejim y le 20ejim de dan la litaziun se crüzia le responsabl/la responsabla dl ofize lital te na sentada publica, lasciada alsavëi dui dis denant sön la tofla de comun, en presënza dles rapresentantes/di rapresentanc de lista da:

1. trá ala niza por vigni seziun litala dl Comun la presidënta/le presidënt, la secreteria/le secreter y tan de cumpëdausc che al vá debojëgn;
2. mëte adöm, tiran ala niza, na gradatöra di inoms dles presidëntes/di presidënc, dles secreteries/di secreters y dles/di cumpëdausc por baraté fora, les zitadines/i zitadins trac fora che renunziëia al’inciaria o ne sciafia nia da l’azeté.

Sce le numer di inoms trac fora ne tleca nia, se crüzia l’ofizial lital de comun da nen trá fora ciamó danter les porsones scrites ite tles listes litales dl medemo comun.

L’ombolta/L’ombolt ti lascia alsavëi ales porsones chirides fora le plü debota che ara vá, y al plü tert chinesc dis dan la litaziun, che ares é gnüdes nominades.

Sce al é rajuns zities che ne conzed nia da surantó l’inciaria, ti mëssel gní lascé alsavëi al’ombolta/al ombolt te 48 ores da canche an é gnüs alsavëi che an é gnüs nominá. L’ombolta/L’ombolt se crüzia spo da baraté fora les porsones che ne pó nia surantó l’inciaria cun litadësses/litadus dla gradatöra preodüda. La nominaziun ti vëgn lasciada alsavëi ales porsones interessades alplü tert trëi dis dan la litaziun.

Le paiamënt di componënc dl ofize lital de seziun ti corespogn a chël preodü por i referendums dala lege di 13 de merz dl 1980, n. 70.

• Presidënt/Presidënta dla sënta litala - 130 €
• Secreter/Secreteria y cumpëdausc - 104 €
• Presidënt/Presidënta dla sënta litala speziala - 79 €
• Componënt sënta speziala - 53 €

Le referendum confermatif vëgn regolamenté dala lege provinziala di 17 de messé dl 2002, n. 10 sön les “Normes sön le referendum preodü dal articul 47, coma 5 dl Statut spezial por le Trentin-Südtirol”.

La lege provinziala n. 10/2002 vëiga danfora che sce le Consëi provinzial aprovëia na lege aladô dl articul 47, coma 2 y 3 dl Statut spezial por le Trentin-Südtirol, se crüzia le Presidënt dla Provinzia atira dla publicaziun dla lege sön le Boletin Ofizial dla Regiun, zënza numer d’ordin y zënza formulaziun de promulgaziun.

Sce le test de lege vëgn aprové cun la maioranza assoluta di componënc dl Consëi provinzial, vëgn la lege publicada cun l’avertimënt che ara vëgn sotmetüda a referendum, sce al é 7 aconsidësses/aconsiadus provinziai o 1/50 dles porsones che á le dërt da lité por les lites provinziales che se le damana te 3 mëisc.

Tla sëntada di 11 de jügn dl 2021 á le Consëi provinzial aprové la lege provinziala sön les Mudaziuns dla lege provinziala di 3 de dezëmber dl 2018, n. 22, “Democrazia direta, partezipaziun y formaziun politica”, y dla lege provinziala di 8 de forá dl 2010, n. 4, “Istituziun y regolamënt dl Consëi di Comuns”, aladô dl articul 47, coma 5 dl Statut spezial por le Trentin Südtirol. La lege é gnüda aprovada cun 18 usc a öna y 15 decuntra. Dedô é la lege gnüda publicada sön le Boletin ofizial dla Regiun cun chësc avertimënt.

De plü informaziuns, dantadöt sön l’iter legislatif dla lege, é da ciafé sön la plata internet dl Consëi provinzial: www.consiglio-bz.org

Ciari a düc i ac che se referësc al iter dl dessëgn de lege te Consëi

Ti 3 mëisc preodüs dala lege n. 10/2002 él gnü presenté te Consëi 2 domandes de referendum confermatif desvalies. Les domandes é gnüdes sotmetüdes a n’ejaminaziun de realisabilité dala Comisciun por i prozedimënc dl referendum metüda sö aposta.

Do l’ejaminaziun scrita dant él gnü detlaré che öna dles döes domandes de referendum é realisabla.

Domanda de referendum di 15.09.2021 – Aconsiadësses/Aconsiadus provinziai che á fat la proposta

La domanda de referendum dada jö ai 15 de setëmber dl 2021 da chisc 14 aconsiadus y aconsiadësses provinziai é gnüda detlarada realisabla:

• Atz Tammerle Miriam
• Dello Sbarba Riccardo
• Foppa Brigitte
• Knoll Sven
• Köllensperger Paul
• Leiter Reber Andreas
• Mair Ulli
• Nicolini Diego
• Ploner Alex
• Ploner Franz
• Repetto Sandro
• Rieder Maria Elisabeth
• Staffler Hanspeter
• Urzì Alessandro

Por le referendum confermatif ne él odü danfora degun QUORUM. Chësc ó dí che le referendum vel bel anfat tan de porsones che vá a lité.

Chësta é la domanda da ti fá a che che lita:

Zetola litala blancia

“Sëise a öna cun le test de lege sön les “Mudaziuns dla lege provinziala di 3 de dezëmber dl 2018, n. 22, “Democrazia direta, partezipaziun y formaziun politica”, y dla lege provinziala di 8 de forá dl 2010, n. 4, “Istituziun y regolamënt dl Consëi di Comuns””, aprovada dal Consëi provinzial ai 11 de jügn dl 2021 y publicada sön le Boletin Ofizial dla Regiun n. 27 di 8 de messé dl 2021?”

Desćiariede jö chiló le PDF cun le test dla lege sotmetüda a referendum confermatif

Desćiariede chiló le PDF cun le test coordiné dles leges provinziales n. 22/2018 y n. 4/2010